Buat Barak Ba Bro!

 
Hey bro!! Fitun mutin nee
Hosi ruin Ita hotu nian

Hey bro!! Mean nee
Hosi ran Ita hotu nian

Hey bro!! Nakukun ne’e

Hosi terus ita hotu nian

Hey bro!! Kinur ne’e

Hosi riku ita hotu nian

Hey bro!! Ukun an nee
Hosi povu Jaco to Oecusse

Ohin o hisik kosar  ba  moris di’ak
Ohin o Husik  Seluk Ba Morris kiak

O SOE kiak mai ha’u ulun
O Sosa Prado ba o nia Kidun

Fó hamlaha ba ha’u kabun
Fó pensaun  Ba o nia sasán vital

O trata di’ak o nia saúde vital
Saúde ema kiak trata la loos

Ibun hakilar, salva osan povu

Liman hit kartaun, gasta osan povu

Prado mamar, vidru metan, AC malirin
Oin pensaun, lian projetu, kakutak sa’e aviaun

Oin mahar tan bolsu mahar
Ain tuur mamar tan fuan mamar

Isin besi asu ba kilat musan
Isin borus ho dollar musan

Hakarak o ukun nafatin la’o
O hakarak ha’u ain nafatin la’o

 
Sura mesak istória luta
Sura mesak osan mina iha nia konta

Mate ka moris ukun rasik an

Mate ka moris ukun ba an rasik

A Luta Kontinua, vitória sempre

Kontinua Luta atu sempre hemu bir Victoria

Fatuhada, 23 Marsu 2013
Hosi: Juvinal Dias, Le'e ona durante Palku Arte Popular iha 5 Abril 2014